O Concello de Boiro quere impulsar a reciclaxe nos distintos núcleos de poboación e para favorecelo habilitou tres puntos limpos móbiles que rotan por todas as parroquias do municipio. O obxectivo deste programa (Reciclaxe en movemento) é achegar o punto limpo de Espiñeira ás vivendas.
O programa comezou no ano 2021 con dous puntos limpos móbiles, aos que se vén de incorporar un terceiro. Os puntos limpos que xa se están a mover polos distintos núcleos de poboación “conteñen sete bocas de residuos para a recollida de lámpadas e fluorescentes, téxtil e roupa, xoguetes e outros plásticos que non se poden depositar no contedor amarelo, pilas e baterías, aceites e minerais… entre outros”, explicou a concelleira Olga González, engadindo que cada un dos puntos limpos móbiles estará durante 15 días nun núcleo de poboación e irán rotando durante todo o ano.
Para a adquisición do terceiro puntos limpos móbil, o Concello de Boiro recibiu unha subvención da Consellería de Medio Ambiente e Cambio Climático con vistas ao financiamento de actuacións en materia de residuos de competencia municipal, co-financiadas polo fondo europeo relativo ao Mecanismo de recuperación e resiliencia da UE no marco do Plan de recuperación, transformación e resiliencia, financiado pola Unión Europea-NextGenerationEU.
“É unha medida que busca achegar o punto limpo de Espiñeira ás familias e un paso máis para favorecer a reciclaxe”, afirmou o alcalde. Os puntos limpos móbiles so poden recibir residuos dos fogares particulares, non se aceptan residuos industriais ou que deberan ter unha xestión específica.
O Concello de Boiro dispón dun punto limpo fixo no parque empresarial de Espiñeira aberto de martes a sábado en horario de 10.00 a 14.00 horas e de 16.00 a 20.00 horas. Para a recollida de aveños (enseres) porta a porta é preciso facer unha solicitude previa no teléfono 981 83 89 08 ou no enderezo electrónico coregal.boiro@coregal.gal .
