O cadáver foi achado este luns na beira do areal do Galiñaceiro, na parroquia de Esteiro.
Os servizos de emerxencia confirmaron este luns o falecemento dun home cuxo corpo foi localizado na beira da praia do Galiñaceiro, situada no lugar da Formilla, pertencente á parroquia de Esteiro, no municipio coruñés de Muros.
O suceso tivo lugar contra as 17:25 horas, momento no que un particular alertou á central do 112 Galicia ao decatarse da presenza do corpo na praia, aparentemente sen vida. O alertante sinalou aos operadores que non era preciso mobilizar medios específicos de rescate na auga, xa que a persoa se atopaba nunha zona de fácil acceso na beira.
Tras recibir o aviso, desde o Centro Integrado de Atención ás Emerxencias de Galicia (112) activouse de inmediato o protocolo correspondente, mobilizando ao Servizo de Urxencias Sanitarias de Galicia-061 e á Garda Civil. Así mesmo, foron avisados os servizos de Gardacostas de Galicia e Salvamento Marítimo.
Unha vez desprazados ata o lugar, os profesionais dos equipos de emerxencias só puideron confirmar o falecemento da persoa. Polo de agora, investíganse as circunstancias do ocorrido.
