O Concello de Boiro e a patronal boirense (ABE) renovaron este mércores 13 de novembro a súa colaboración coa sinatura do convenio anual para desenvolver actividades de promoción económica e comercial.
O alcalde, José Ramón Romero; e o presidente da entidade, Daniel García; xunto co concelleiro de Comercio, Formación e Emprego, Roberto Lojo; e o xerente da entidade, Tomás Estévez; analizaron as principais liñas de traballo e accións a desenvolver nos vindeiros meses.
O Concello de Boiro destina 30.000 euros para o impulso da actividade comercial no municipio co desenvolvemento de actividades e campañas dende a ABE. “Este aporte económico que realizamos dende o Concello redunda no dinamismo empresarial, cada vez vemos como o comercio boirense consolídase como un reclamo, o que favorece o crecemento económico das nosas empresas”, afirmou o alcalde, José Ramón Romero.
Ademais das campañas específicas que a ABE realiza ao longo do ano, conta con persoal administrativo e técnico dedicado ao asesoramento ao emprendemento e á actividade empresarial. Este convenio de colaboración forma parte das accións que o Concello de Boiro leva a cabo en materia de promoción económica, do empresariado e emprendemento para fomentar o emprego no municipio.
