Tabú, de Colectivo Glovo, chega esta fin de semana a Rianxo. Trátase dunha peza de danza contemporánea que presenta cinco personaxes femininos da década de 1920 nun ambiente de entroido no rural galego, onde cada muller amosa o seu tabú a través dunha proposta dinámica e accesíbel para todo tipo de público. A cita será este venres 29 de novembro a partir das 21.00 horas. A entrada será de balde até completar a capacidade.
Colectivo Glovo
Colectivo Glovo nace en 2016 baixo a dirección de Esther Latorre (España) e Hugo Pereira (Portugal) xerando así un espazo de creación onde ambos, intérpretes e coreógrafos, desenvolven conxuntamente a súa faceta máis imaxinativa.
Con sede en Galicia, traballan na creación da escena tanto para teatros como rúa e espazos non convencionais, así como xestores culturais, xa que un dos seus principais obxectivos como compañía é aumentar as dimensións de alcance das dinámicas do corpo.
Orixes de Tabú
En agosto de 2020, no centro de Allariz – Galicia, o colectivo descubriu “unha fascinante fotografía de 1925”, capturada por Manuel Riesco, que retrata a doce mulleres. A imaxe, en branco e negro e parte do Arquivo Municipal de Allariz, mostra a estas mulleres con actitude desafiante e peiteados estilo belle époque. Preguntaron quen eran, que lles sucedeu. “Esta imaxe”, relata o Colectivo Glovo, “mergullounos na procura das súas historias esquecidas”.
Tabú cuestiona a aparencia como unha posibilidade de futuro.
