O alumnado de actividades auxiliares en viveiros, xardíns e centros de xardinería do Obradoiro de Emprego Tahume IX, impulsado polos Concellos de Porto do Son e Ribeira, acondicionou os días pasados cadansúa contorna verde do Centro de Saúde de Xuño e das Escolas de Educación Infantil de Carballosa e Caamaño.
Ademais, o alumnado de conservación e mellora de montes de Tahume puxo a punto, con labores de acondicionamento e mellora, a contorna verde da praia de Ornanda, en Portosín.
Como dixemos, o Obradoiro de Emprego Tahume (edición IX) vén da man dos Concellos de Porto de Son e Ribeira para favorecer a inserción laboral da poboación dos ditos municipios que se atopa en situación de desemprego.
As especialidades impartidas nesta convocatoria de Tahume son: Actividades auxiliares en viveiros, xardíns e centros de xardinería e Actividades auxiliares en conservación e mellora de montes. O alumnado da novena edición de Tahume (20 persoas demandantes de emprego, 10 por cada un dos concellos organizadores) conta coa axuda dun director de obradoiro, dous mestres para ambas especialidades e un titor.
