O Concello de Muros compartiu este 28 de novembro o seu programa de actividades de Nadal, unha axenda ateitada de propostas para todas as idades nas que os principais protagonistas “serán os nenos e nenas”, segundo confirmaron as/os participantes na cita cos medios, na que se agradeceu a colaboración e a implicación dos centros educativos de Muros e das seguintes asociacións e entidades: CA Serres Runners; ED Os Miúdos; ADISBISMUR; AC O Xeito; AC Fouleada, e AC Agrocovo.
“Presentamos unha programación ampla e variada, na que traballaron varias concellerías e que levará o Nadal a todas as parroquias de Muros”, asegurou a alcaldesa, María Lago, que agradeceu “o agarimo e a colaboración da comunidade educativa e do tecido asociativo local”. Un agradecemento no que coincidiu Caridad González, que como concelleira de Cultura adiantou “un programa de música e teatro para que desfruten as familias”, como a cita do 28 de decembro co espectáculo A Xanela do Maxín. Rato Perez.
Segundo explicaron, a axenda comezará en Esteiro (o día 4 ás 18h na Axencia de Lectura) e Louro (o día 5 ás 18h no Centro Social), que acollerán dous obradoiros creativos de contos, adobíos e postais para público infantil e familiar antes do acto do prendido das luces de Nadal, que será o xoves 5 de decembro ás 19.00 horas no Curro da Praza, despois da actuación de Cayetano Lledó e antes dunha visita guiada polo centro histórico.
O venres 6 ás 17h celebrarase outro obradoiro infantil na Sala Nasmo, ás 17h.
O sábado 7 o Edificio do Mercado de Muros acollerá outro taller ás 11h e pola tarde, ás 16h, celebrarase outro obradoiro de postais na Casa Reitoral.
O domingo 8 haberá un espectáculo teatral en Esteiro, no local da SCRD Esteirana ás 18.30h: os Contos de Pepe (Xosé Agrelo Hermo) da man de O Xeito Teatro.
O programa inclúe obradoiros e sesións de contacontos en todas as parroquias, un concerto de Nadal da Escola Municipal para os usuarios do Centro de Día (o mércores 11), un mercadiño solidario o venres 13 coa colaboración dos centros educativos ou a Gala de Premios Barbantia de Cultura 2024 (o sábado 14 no Auditorio do Centro Cultural, ás 12.30h).
O sábado 21 será a Gala do Deporte (ás 18.30h), o domingo 22 o Festival Benéfico de ADISBISMUR (ás 11h), o venres 27 a Festa de Nadal no Pavillón de Miraflores (ás 17h) e o sábado 28 a San Silvestre de Muros (ás 20h). O 3 de xaneiro celebrarase a Festa de Reis no Pavillón Xosé Lago de Esteiro, a partir das 17h.
Destacar tamén dúas grandes citas do Nadal en Muros: a visita de Papa Noel a Muros o 23 de decembro e a tradicional Cabalgata de Reis o 5 de xaneiro.
A programación completa estará dispoñíbel na web municipal e máis no Facebook do Concello.
