Proseguen as actividades da campaña Muros Consciente 2024 impulsada polo Concello e o tecido comercial local para reivindicar hábitos de consumo saudábeis e sostíbeis que repercutan positivamente no comercio de proximidade e diametralmente opostos ás compras do Black Friday (que repercuten case na súa totalidade en multinacionais externas e contribúen a xerar graves problemas ambientais). Ao abeiro da axenda deste programa colleu corpo o Museo na Rúa A luz que enche os espazos baleiros.
Trátase “dunha inspiradora exposición que transforma os locais baleiros do Concello en auténticos faros de reflexión”, explicou a alcaldesa, María Lago.
En concreto, A luz que enche os espazos baleiros é un convite a “ver a beleza e o potencial no baleiro, pero tamén a ser parte activa dun futuro máis sostíbel”, unha proposta crítica na que contribúen artistas comprometidas contra os hábitos de consumo que degradan o medio ambiente, provocando abuso de plástico, sobreconsumo e unha mala xestión dos recursos.
O Concello agradeceu a “total disposición e colaboración por parte das artistas”, e enviou “un especial agradecemento a todas as persoas propietarias dos baixos baleiros, que con tanto gusto nolos cederon para as exposicións das obras”.
