Co obxectivo de seguir reivindicando a nomenclatura de “Carretera do Muelle” e de mobilizar á veciñanza arredor desta reclamación, a vila de Escarabote (Boiro) vai acoller este sábado unha celebración dun magosto popular, organizada pola plataforma veciñal que reclama o mantemento do nome da dita rúa. Será a partir das 17.00 horas no antigo Bar Sirena. Haberá música, castañas, doces e chocolatada de balde.
O obxectivo, explican, é “xuntarnos e seguir reivindicando a revocación do cambio de nome da rúa Carretera do Muelle”.
A veciñanza que organiza o magosto deste sábado explica deste xeito a súa reclamación: “En abril de 2023, a petición de catro persoas, o Concello de Boiro decidiu mudar o nome da nosa rúa para homenaxear ao Padre Joseba Beobide, un párroco que navegou en Terranova con mariñeiros de diferentes zonas de Galicia. Nós non poñemos en dúbida o labor realizado polo Padre Joseba pero levamos meses loitando por conseguir que se revoque este cambio e poidamos seguir mantendo o mesmo nome de toda a vida, co que se coñece tradicionalmente a rúa, que é co que nos sentimos identificados”.
