Carlos Mazón, presidente da Comunitat de Valencia, e Alberto Núñez Feijoo, presidente nacional do PP, deron un “volantazo” a canto ata o de agora dixeron sobre as responsabilidades de cada quen na intervención militar en terras desa comunidade para contribuíren a mitigar os moitos problemas derivados da DINA (DANA) que afectou -e aínda afecta- a Valencia: Mazón, para se desdicir das responsabilidades que afectan ao seu cargo en relación co control da situación, e Feijóo, para moderar as súas opinións a respecto do Goberno de Pedro Sánchez.
Dá a impresión de que no seo do PP houbo un chamado á cordura por parte de Núñez Feijoo, mentres que Mazón semella ter desenterrado o machado de guerra para ter vivo o desencontro que a nada bo conduce. Sobre todo, apòs a intervención diante dos medios de comunicación do xeneral xefe da UME, Francisco Javier Marcos.
Os membros da Unidade Militar de Emerxencias (UME) todos eles integrantes do Exército español parcialmente despregada na Comunidade Valenciana, actuou e actúa en función do que emana do Goberno autonómico. É a Comunidade Valenciana a que marca as prioridades e o Exército fai o que este lle di.
Por se había dúbidas, “quen dirixe a emerxencia é a Comunidade Autónoma. Quen decide a onde imos ou a onde nos imos é a Comunidade Autónoma. É o director da emerxencia quen nos di neste sector ou neste outro”.
Son as opinións do xa citado xeneral xefe da UME, Francisco Javier Marcos, o luns pola tarde, quen interviu en todo momento facendo fincapé en que a UME actúa en función do que lles diga o Goberno valenciano “que nos marcan as prioridades e nós facemos todo o que nos din e máis”.
O xefe da UME afirmou que o día no que se desencadeou a emerxencia o seu servizo xa viña seguindo a situación meteorolóxica, o que permitiu, antes de que a comunidade elevara o nivel de alerta, ter todo preparado xa para a intervención inmediata ao batallón número 3 da base Jaime I, en Valencia.
Ordenou o despregamento duns 500 militares, de xeito que cando se produciu a autorización da Generalitat valenciana estaban en condicións de saír inmediatamente. Tardaron 15 minutos en acadar o lugar da emerxencia, a zona de Utiel-Requena. Outro milleiro de militares estaban asimesmo alertados para canio chegase o nivel de emerxencia a toda a provincia de Valencia. “Se non estiveron antes foi debido á meteoroloxía e por orde e disciplina.
O xeneral Marcos deixou claro que “quen dirixe a emerxencia é a Comunidade autónoma. A partir de ahí, a unidade militar actúa coas súas propias ordes, pero sempre en colaboración”.
Arestora son case 8.000 os militares que traballan in situ na zonas afectadas. Aos militares da UME súmanse o Exército e a Garda Real, así como os que apoian loxisticamente desde parques e centros de abastecemento.
As que citabamos como correccións do presidente autonómico valenciano e do PP nacional -Mazón e Feijoo, respectivamente- semellan evidentes.
