O Concello de Lousame abre o prazo de reserva de entradas para o espectáculo Rock ‘n’ magic, do Mago Teto, segunda e derradeira sesión do Festimaxia 2024 que se celebra este sábado 23 de novembro, ás 18:00 horas, no auditorio da Casa da Cultura de Lousame. As entradas son de balde e están dispoñibles dende hoxe en bandoticket.com.
Ata as 14:00 horas do xoves 21 de novembro, as entradas estarán reservadas unicamente para persoas empadroadas en Lousame. De quedaren prazas libres, abrirase o espectáculo á participación de persoas doutros municipios. Dende o Concello de Lousame tamén solicitan ás persoas que se anoten, e que finalmente non poidan acudir ao Festimaxia, a que chamen á Casa da Cultura para poder así deixar a súa butaca a outras persoas.
Rock ‘n’ magic
O espectáculo Rock ‘n’ magic, dirixido por Fran Rei, é algo máis ca unha función de maxia, é un concerto de rock and roll no que estará acompañado por Fer Risco, na batería, e Mon Orencio, na guitarra. Deste xeito, os veciños e veciñas de Lousame poderán desfrutar dunha actuación onde a maxia do Mago Teto convive con algúns dos clásicos do rock como Led Zeppelin, Bob Dylan ou Los Suaves.
Esta actuación mestura as dúas paixóns do Mago Teto: o rock e a maxia, conformando un espectáculo cargado de ilusión, ritmo, humor e moita, moita tralla. Aparicións sorprendentes, xogos de adiviñación e ilusións máxicas comparten protagonismo coas estrelas do rock, presentes a través dunha banda en directo. Un espectáculo único que está organizado e financiado polo Concello de Lousame e que porá o punto e final ao Festimaxia Lousame 2024.
