O Concello de Rianxo informou da aprobación das ordenanzas que regulan o uso das oito vivendas sociais do Concello localizadas na rúa dos Mestres. O regulamento obtivo impulso definitivo no pleno da Corporación, contando coa unanimidade de todos os grupos. Trátase dos textos regularán os criterios de adxudicación, normas de funcionamento e utilización das vivendas, así como a taxa que deberán aboar as persoas que as ocupen.
Nos textos faise saber que o prazo da cesión das vivendas será de dous anos, porén este poderase renovar por novos prazos bianuais ata un máximo de seis anos. O nivel de ingresos da unidade de convivencia será o elemento fundamental á hora de valorar as solicitudes de cesión, mais teranse en conta tamén outros como as condicións da vivenda na que reside a unidade de convivencia solicitante ou mesmo a composición desta.
A taxa a aboar por parte das unidades de convivencia que ocupen as vivendas será variable e fixarase en función da renda per cápita das ditas unidades.
As ordenanzas someteranse a exposición pública por un prazo de trinta días dende a súa publicación no Boletín Oficial da Provincia. Ao remate deste proceso abrirase un prazo para que as persoas interesadas poidan presentar a súa solicitude de uso dalgunha das oito vivendas.
Proxecto referencial de posta en valor
A rehabilitación das Casas dos Mestres de Rianxo foi un dos grandes proxectos da comarca dos pasados anos en materia de rehabilitación e políticas sociais: un exemplo referencial de recuperación de vivendas e espazos cun marcado fin social impulsado e consolidado na anterior lexislatura e prolongado polo Goberno local actual. O proxecto de rehabilitación abrangueu a recuperación de oito vivendas, co obxectivo de adicalas a alugueiro social ou a dar acollida a persoas vítimas da violencia machista ou en situación de emerxencia. As Casas dos Mestres levaban máis de medio século abandonadas e en estado de progresivo deterioro.
