As praias de Carnota, Muros e Outes foron obxecto dunha limpeza integral de lixo grazas á colaboración entre a entidade inclusiva ADISBISMUR e Limpocean (Asociación para Océanos Limpos de Plástico), que lideraron unha acción conxunta de retirada de residuos (plásticos e demais) no marco do proxecto PINEA: Proxecto Interxeneracional de Educación Ambiental. Esta iniciativa logrou sacar dos areais máis de 100 quilos de lixo, demostrando o impacto positivo da colaboración entre xeracións e colectivos en defensa do medio ambiente.
A terceira actividade do proxecto PINEA congregou persoas maiores, nenos e nenas, adolescentes e usuarias/os da asociación de Muros e Outes ADISBISMUR nun esforzo colectivo por restaurar o litoral. Con Limpocean como socio chave, as xornadas combinaron a retirada de residuos con tarefas de clasificación, todo isto mentres se fomentaba a educación ambiental e a reflexión sobre a sostibilidade.
“Foi unha experiencia que uniu xeracións e nos fixo reflexionar sobre a importancia das pequenas accións para lograr grandes cambios”, comentou unha das educadoras sociais de ADISBISMUR.
O proxecto PINEA, que se iniciou en setembro de 2023 grazas ao apoio do GALP Seo de Fisterra-Ría de Muros-Noia: Costa Sostible, busca fomentar a conciencia ambiental a través da inclusión social e o traballo interxeracional. Actividades previas, como charlas sobre os efectos dos plásticos no mar organizadas coa colaboración de Mares da Fin do Mundo, sentaron as bases para a intervención nas praias de Carnota, Muros e Outes.
Limpocean é unha asociación sen ánimo de lucro dedicada a reducir o impacto dos plásticos no Océano Atlántico, desempeñou un papel fundamental nesta xornada. A súa experiencia e recursos axudaron a que a actividade non só fose exitosa na limpeza, senón tamén na educación e sensibilización dos participantes.
“Esta colaboración foi unha mostra do impacto que podemos conseguir ao unir esforzos locais. Non só limpamos praias, senón que creamos conciencia para protexer o océano”, destacou unha representante de ADISBISMUR.
A acción das praias marca un fito no proxecto PINEA, que continuará ao longo de 2024 con novas iniciativas enfocadas na educación ambiental e na promoción da economía circular. Este tipo de proxectos non só benefician ao medio ambiente, senón que fortalecen os lazos entre comunidades e xeracións.
