O equipo directivo da Entidade Urbanística de Conservación do Polígono Industrial da Tomada, e a Axencia de Doazón de Órganos e Sangue (ADOS) organizaron durante o día de hoxe unha acción conxunta de doazón de sangue, que ten como obxectivo favorecer a participación activa das persoas que traballan nesta contorna empresarial da Pobra do Caramiñal.
Así, durante toda a mañá deste xoves 7 de novembro, unha unidade móbil da Axencia estivo estacionada diante das instalacións de Protección Civil no Polígono da Tomada, en horario de 09.30 a 14.00 horas para atender a todas as persoas que desexen doar sangue.
Nas xornadas previas á a visita da unidade móbil, desenvolveuse un intenso labor de distribución de información relacionada coa doazón de sangue, co obxectivo de promover a participación dos profesionais.
Así mesmo, ao longo da mañá visitaron a unidade móbil, directivos da Entidade Urbanística, encabezados pola súa presidenta e directora de Relacións Externas de CONGALSA, Isabel Cañas, e o responsábel de xestión de colectas de ADOS, José María Vázquez Estepa, que animaron ás persoas que traballan na área industrial a facer este xesto solidario que ten como obxectivo “fomentar a cultura social favorábel á doazón de sangue”, sinalaron.
Neste sentido, Isabel Cañas, sinalou que “este tipo de iniciativas non só reflicte a responsabilidade social das nosas empresas, senón que tamén fomentam a solidariedade e o apoio mutuo entre todos os que formamos parte desta comunidade.” Ademais, agradeceu a ADOS a “oportunidade de contribuír dunha maneira tan directa e significativa a salvar vidas”.
Agradecemento
Pola súa banda, ADOS quixo agradecer á Entidade do Polígono e ás empresas do mesmo, “pola súa sensibilidade e apoio nesta actividade e lembrou a importancia da contribución das empresas para permitir o desenvolvemento deste tipo de campañas dentro da xornada laboral”.
Neste sentido lembraron que “as campañas en empresas resultan fundamentais para obter entre 400 e 500 doazóns de sangue diarias en Galicia, que son as necesarias para que os hospitais galegos poidan desenvolver correctamente o seu labor asistencial”.
