Dende o Concello da Pobra do Caramiñal veñen de anunciar a súa vontade de axudar á zona afectada pola Depresión Illada en Niveis Altos (DINA), concretamente a Aldaia. Máis polo miúdo, A Pobra enviará ao municipio valenciano recursos humanos e materiais: catro voluntarios da Protección Civil e un axente da Policía local partiron na mañá deste 7 de novembro para realizar labores de achique e limpeza de rúas e de seguridade cidadá, ademais doutros traballos que se lles poida encomendar, nesta zona azoutada pola DINA, se ben a localización pode variar segundo as necesidades unha vez no lugar.
Engadir que para todo isto levan consigo un vehículo todoterreo, un remolque, un coche patrulla, xeradores, mangueiras, palas, rastros, caldeiros e bombas de achique, entre outros medios.
“Dende o Concello da Pobra do Caramiñal non dubidamos en poñer a disposición medios humanos e materiais para axudar nos traballos que se están levando a cabo nos municipios afectados pola DINA. Por iso, xestionamos a través da Dirección Xeral de Emerxencias este apoio e iniciamos a planificación para os vindeiros días de estadía, no noso caso, inicialmente, con destino en Aldaia”, manifesta o alcalde e titular da Concellaría de Seguridade, José Carlos Vidal. Sinala que xa a finais da semana pasada se valorou o envío de artigos de primeira necesidade, pero tralas consultas pertinentes “optamos por agardar dado os problemas de loxística e almacenamento alí existentes polo colapso”.
O equipamento do voluntariado permitirá achicar 300.000 litros de auga por hora, mentres que o policía local realizará tarefas de seguridade cidadá durante as noites e apoio a Protección Civil polas tardes.
