Na tempada de outono é moi habitual atopar grande variedade de fungos, pois é a época na que estes organismos abrollan con máis intensidade e dende a Pobra do Caramiñal veñen de mergullarse de cheo neste eido dos fungos coa celebración da oitava edición das Xornadas Micolóxicas.
Dicir que este encontro, que promove a Concellaría do Medio Ambiente, nace coa vontade de “divulgar as propiedades e aproveitamentos dun recurso natural que temos nos nosos bosques. A Pobra goza dunha gran biodiversidade no seu litoral, pero tamén nos seus montes. É iso querémolo explorar no outono”, dicía o concelleiro do Medio Ambiente, Xosé Lois Piñeiro.
Durante a pasada semana desenvolvéronse o conxunto das actividades cun marcado carácter ambiental encamiñado tanto á comunidade educativa da primaria como á poboación en xeral.
Leváronse a cabo obradoiros micófilos e unha exposición integrada polas imaxes galardoadas nas convocatorias previas do concurso fotográfico aos CEP Salustiano Rey Eiras e CEP Pilar Maestú Sierra, amais dunha charla sobre gastronomía e nutracéutica e un obradoiro de inoculación do cogomelo xaponés Shiitake para a cidadanía en xeral.
Cómpre subliñar que a maior parte das propostas concentráronse no domingo 10 de novembro. Nesta xornada primeiro celebrouse unha expedición pola zona de Cabío para inspeccionar algunhas das especies de fungos que máis abundan neste territorio para conformar unha pequena exposición que tivo lugar deseguido no mercado municipal.
Foi esta instalación municipal o punto elixido para un showcooking da man de Luis Arijón, xefe de cociña do restaurante Nojira, con diferentes e innovadoras receitas en base aos cogomelos. Engadir que, con anterioridade a esta mostra de cociña, facíase entrega dos premios do VIII Concurso Fotográfico de Micoloxía, que rexistrou unha participación de 63 instantáneas. O alcalde, José Carlos Vidal, fixo entrega dos galardóns que repartiron un total de 750 euros en premios baixo o formato de vales de compra para trocar no comercio local ou na web Deanshop, resultando gañadores: Sergio Pérez Boullón coa primeira distinción, Tomás Rodríguez Novoa coa segunda e Ramón Carlos Encisa Fraga coa terceira.
