A patronal boirense (ABE) presentou este luns 25 de novembro a súa nova iniciativa de dinamización comercial e empesarial, baixo un lema que é unha pregunta directa a veciños e visitantes: Non sabes que regalar? Regala Boiro! Este é, de feito, o texto que acompaña a campaña de promoción dos bonos regalo ABE para este Nadal. O obxectivo é que tanto os veciños como as empresas utilicen os bonos da ABE para agasallar aos seus seres queridos ou no caso das empresas utilizalos como aguinaldo de Nadal para os traballadores e clientes. A patronal lembra que os bonos consisten “nunha caixa personalizada que inclúe vales de compra de 5€ e poden utilizarse nos 207 negocios asociados a ABE”. Por certo que os clientes poderán elixir a cantidade de cartos incluídas no bono, sempre en múltiplos de 5 euros.
A asociación explica tamén que “hai unha enorme variedade de negocios, dende téxtil, calzado, deportes e regalo a alimentación, produtos da praza de abastos, hostalería e gasolineira ou mesmo servizos coma masaxes, dentista ou fotografía”. Como novidade este ano estrearase a caixa con motivos do Nadal e con cada caixa vendida entregarase unha bolsa de bombóns de edición especial e limitada co corazón de Somos Boiro. Poden mercarse nas oficinas da ABE facendo a reserva por teléfono, correo electrónico, web ou de maneira presencial.
“Os bonos non teñen caducidade e o seu uso repercute no pobo”, salientan dende a asociación, engadindo que na web da ABE hai unha sección específica con información detallada e un formulario para realizar a compra.
