Proseguen esta semana as actividades da primeira edición do Ciclo Cultural Infantil e Itinerante de Porto do Son, e fano con Radio Bulebule, espectáculo do músico multiinstrumentista galego Paco Nogueiras que rende homenaxe á comunicación radiofónica e á súa capacidade para facernos chegar mensaxes a prol da diversidade, o coidado do medio, a vida saudábel ou a cultura e a lingua galega. Será este domingo 6 de outubro na Casa da Cultura de Ribasieira, a partir das 17.30 horas e con entrada gratuíta (con acceso gratuíto até completar o aforo). Organiza a Área de Cultura de Porto do Son coa colaboración da Deputación da Coruña. Máis información sobre o espectáculo na web de Paco Nogueiras.
Radio Bulebule é, en palabras do seu creador, “unha radio itinerante, ambulante e cantante que retransmite para o mundo en linguaxe universal”. Paco Nogueiras convídavos neste espectáculo a vivir a radio en directo nun divertidísimo programa cheo de humor, baile e cancións. Temos de todo: deportes, servizos informativos, o tempo, axenda cultural. Trátase pois da “mellor guía para descubrir as últimas tendencias, e mesmo para crear xuntos un gran éxito vogal”.
Traballo premiado na categoría de Música Infantil nos VIII Premios Martín Códax da Música celebrados no ano 2021.
