No serán deste mércores 30 de outubro a sede na rúa Rosalía de Castro da Asociación de Empresarios de Ribeira acolleu unha reunión informativa cos membros da entidade, pertencentes aos sectores locais do comercio, a hostalería e a restauración, na que se deu conta dos traballos que se están a levar a cabo para perfilar a Campaña de Nadal de 2024. Accións como a a aldea de Nadal e a pista de xeo. Con respecto a estas actividades explicouse cal é a situación para poder levalas a cabo.
Na reunión fíxose saber que non se vai dispor dun incremento na asignación achegada polo Concello para a Asociación Empresarios con vistas a dar corpo ás diferentes actividades que se desenvolven no transcurso do ano: “Non só se mantén na mesma asignación contía que en anos anteriores, senón que ademais se incumpre o compromiso manifestado coa argumentación do orzamento”, explicou a directiva da patronal, que aproveitou a sesión para lembrar que se lle pediu ao Concello “a reserva de chan en praza de España, para, coa antelación necesaria, poder contratar os eventos programados”. E engadiron: “A día de hoxe nada sabemos da devandita dispoñibilidade, o que dadas as datas fainos imposible xa contratar a aldea de Nadal pois as empresas que o levan a cabo xa se comprometeron con outros municipios, e é por iso que nos vemos na necesidade de pedir a Portos de Galicia a ocupación de terreos no Malecón como alternativa para a instalación da pista de xeo, pese ao custo que isto implica”.
Afondando na posibilidade de habilitar a pista de xeo, a asociación recoñeceu que se ve na necesidade de pedir aos comerciantes afrontar unha derrama, para compensar a diminución dos fondos achegados polo Concello, “necesaria para que se poida materializar a dita instalación”. A directiva tamén expuxo a alternativa, aprobada por unanimidade, de “facer acordos con outras entidades para lograr o orzamento necesario, entre as cales atópanse os concellos limítrofes, que, a pesar de realizarse a actividade en Ribeira, están interesados e así nolo manifestaron en participar para que esta actividade leve a cabo”.
Dende a dirección da patronal recoñeceron sentirse “abandonados polo Concello”, polo que lle pediron publicamente o equipo de Goberno local “que facilite a realización da devandita actividade por ser de gran importancia económica para a nosa hostalería, comercio e como non, para a nosa cidadanía que poderá gozar do devandito evento”.
