A entidade galega de divulgación tecnolóxica e científica Igaciencia resolveu o palmarés dos premios do seu XV Concurso Galego de Robótica, destinados a exaltar o talento da rapazada dos nosos centros educativos en materia de tecnoloxía creativa e STEM (acrónimo de Ciencia, Tecnoloxía, Enxeñaría e Matemática). Os galardóns, nos que participaron máis de 800 alumnos de 30 centros da xeografía galega, foron resolvidos na Coruña a semana pasada, logo da celebración do concurso entre o 21 e o 25 de outubro. O certame contou novamente coa colaboración do Concello da Coruña.
O palmarés tivo novamente protagonismo de Ribeira. Así, un grupo de estudantes do IES N°1 formado por Nicole Barros Martínez, Adrián Otero Acosta, Xoel Ageitos Somoza, Lázaro Losada Borja e Pedro Estévez Suárez acadou a primeira posición por segundo ano consecutivo, e fíxoo na categoría de 4°ESO, Bacharelato e e FP. O venres 25 de outubro celebrouse a recollida de premio na cidade da Coruña, onde ademais da entrega de diplomas e o premio económico, fíxose fincapé no labor do IES Nº1 no eido da robótica (xa que se trata da cuarta vez que se acada a primeira posición). Tamén o alumnado recibiu unha pequena homenaxe pois a puntuación acada polo grupo foi a máis alta nos quince anos que se leva celebrando este certame.
