O Grupo Municipal Socialista de Rianxo emitiu un comunicado relativo ao pleno extraordinario que convocou a agrupación para aclarar cuestións fundamentais que afectan ao desenvolvemento e benestar da cidadanía. Na orde do día, incluíronse “puntos críticos” para o PSOE, como o estado de execución das obras municipais, a implantación do servizo de atención temperá, o estado do Centro de Día, o desenvolvemento do solo industrial e a transparencia na xestión das contas municipais, incluíndo contratos e facturas.
“Con todo”, indican os socialistas, “o alcalde mostrou unha falta de vontade para abordar estas cuestións, convertendo o pleno nun exercicio de opacidade e obstaculización do debate”. O grupo foi especialmente crítico co xeito de abordar dende o Executivo local a implantación do servizo de atención temperá, xa que din que “o rexedor negou o seu inicio, desmentindo a evidencia proporcionada polas propias familias e as publicacións informativas do Goberno municipal en setembro”. Para o PSOE rianxeiro, “este tipo de desinformación afecta á transparencia, xera confusión e debilita a confianza na xestión pública.
O PSOE tamén denunciou” a falta de transparencia do grupo de Goberno nas contas municipais, cuestionando a opacidade na xestión de contratos e facturas e o limitado acceso á información sobre a execución de obras e servizos, dificultando así un control efectivo e unha adecuada rendición de contas á veciñanza”. Din tamén que durante o pleno “o alcalde negou ao Grupo Municipal Socialista o dereito a réplica, vulnerando un acordo escrito previo no que se garantía un espazo de intervención a cada grupo, o cal supón unha clara falta de respecto aos dereitos democráticos e aos acordos plenarios”
Así mesmo, os socialistas invitan a BNG e PP de Rianxo a que manifesten tamén esta cuestión relativa a oposición e “que non queden pasivos ante a vulneración dos dereitos democráticos que lles afecta tamén a eles.” Ante esta situación, o PSOE de Rianxo decidiu presentar unha moción para instar o grupo de Goberno a iniciar, nun prazo máximo de 15 días, os contactos necesarios para a redacción dun Regulamento Orgánico Municipal. “Este regulamento permitirá definir de maneira precisa os dereitos e obrigas dos grupos municipais, buscando así evitar novas vulneracións á representación democrática”, sinalaron de o PSOE, engadindo que “os socialistas xa enviamos unha proposta de reunión aos grupos da oposición para acordar as liñas de traballo iniciais deste regulamento”.
