O Concello de Boiro recibe o distintivo Bandeira Verde de Galicia, un galardón que premia aos municipios da comunidade autónoma que destacan polas súas boas prácticas ambientais e de protección e conservación da paisaxe.
Esta iniciativa busca “distinguir aos concellos máis dinámicos e que desenvolven prácticas para o coidado da contorna, o respecto á paisaxe, a redución das emisións de CO2, a redución do consumo enerxético e moitas outras.
O Concello de Boiro conta cunha poboación de 18.984 habitantes que medra no casco urbano en detrimento do rural, polo que as actuacións que se están a levar a cabo dende o Goberno local queren “incidir na interconexión dos núcleos rurais coas zonas máis poboadas” a través de corredores e carrís bici que se establecen no Plan de Mobilidade Urbana Sostible do Concello de Boiro.
Dende o Consistorio explican que “esta distribución da poboación fai que o núcleo de Boiro sexa o eixe das relacións económicas e sociais e o lugar prioritario para realizar actuacións para mellorar a habitabilidade e conseguir un medio urbano máis verde”. Neste sentido estase a traballar en actuacións como a recuperación dos xardíns do Pazo de Goiáns ou o parque da Cachada, así como a creación de novos sendeiros que unen puntos de interese como o do Breiro a Exipto ou o que une o estuario do río Coroño coa finca de Goiáns.
O Concello de Boiro incide tamén na sensibilización con actividades que teñen como finalidade informar á cidadanía das problemáticas locais con actividades como as de eliminación de especies exóticas e invasoras de espazos naturais; ou o programa Boiro libre de plásticos para concienciar sobre a contaminación do mar e as praias.
