Este venres 18 de outubro o BNG compareceu en Noia, para explicar a iniciativa que levará ó parlamento para, instar ó goberno do PP da Xunta,a regular o baleirado e limpeza dos encoros, para “evitar os danos que causan ós bancos marisqueiros e á seguridade das persoas”.
A deputada do BNG no parlamento, Rosana Pérez, acompañada de representantes e portavoces nacionalistas de distintos concellos da ría interpelaba á Xunta, “que é a que ten as competencias, para que se poña do lado dos sectores produtivos da ría, e non do lado das eléctricas que teñen a concesión dos encoros”.
Na ría de Muros e Noia, engadiu “ leva anos pedíndoo o patrón maior de Noia e agora tamén acaba de facer pública a súa petición o presidente das confrarías da Coruña, é necesario un protocolo de desencoro que evite que se abran as comportas coa marea baixa. O BNG tamén levou xa varias iniciativas ó parlamento solicitando isto e, segundo lembrou, “sempre foron votadas en contra polo PP”.
Desde a formación nacionalista advirten de que, nas circunstancias actuais, cun sector marisqueiro á baixa pola merma de capturas e devastado polos episodios metereolóxicos do pasado ano e tamén deste 2024, “medra o temor da incidencia de novos períodos de precipitacións intensas e dunha nova perda de produción que podería ser definitiva en moitos casos”.
A deputada engadiu que “é preciso o regulamento do baleirado e limpeza dos encoros, onde tamén se regulen as sancións ás empresas que responsábeis de danos ás persoas e bens, nomeadamente ós bancos marisqueiros, que supoñen o motor económico de toda a ría”.
