A conselleira de Economía e Industria, María Jesús Lorenzana, visitou este sábado 26 de outubro o concello de Boiro, onde mantivo unha xuntanza de traballo co alcalde, José Ramón Romero, con vistas a analizar as necesidades de solo empresarial deste municipio. A conselleira destacou que “un dos obxectivos da política industrial do Goberno galego é que as empresas teñan máis facilidades de acceso ao solo industrial e promover o crecemento das empresas xa implantadas en Galicia”. Apuntou tamén que o proxecto de orzamentos da Xunta para o ano 2025 recolle a creación de novas figuras de aceleración da ordenación de solo empresarial, como as Zonas de Aceleración de Proxectos Empresariais e Solo, que permitirán, segundo explicou, “simultanear a tramitación urbanística coa dos proxectos, de xeito que se pasaría dunha media de dez anos a menos de dous anos para que as empresas poidan comezar a súa construción”.
María Jesús Lorenzana lembrou que “estas novas figuras de ordenación súmanse á medida xa anunciada, de poñer solo industrial gratuíto á disposición das empresas durante os primeiros oitos anos, unha medida pioneira que permitirá ao tecido empresarial acceder a máis de 500.000 m²”.
Esta iniciativa impacta no orzamento de Xestur por valor de 5M€.
