O equipo directivo da Entidade Urbanística de Conservación do Polígono Industrial da Tomada, formado polo Concello da Pobra do Caramiñal e por representantes de empresas do Polígono, mantivo este mércores 9 de outubro unha reunión de traballo con Beatriz Sestayo, xerente de Solo Empresarial do Atlántico (SEA), entidade que xestiona a dita superficie industrial situada no termo da Pobra.
Durante a xuntanza, que serviu para presentar ao novo equipo directivo da Entidade Urbanística de Conservación, liderado pola súa presidenta e directora de Relacións Externas de CONGALSA, Isabel Cañas, tamén se manifestou a necesidade de “abreviar os tempos para unha terceira fase de ampliación de terreos do polígono”. Neste sentido, Isabel Cañas manifestou que “a demanda de espazo é cada vez maior e contar cun polígono industrial con solo dispoñíbel é un gran atractivo para que se instalen novas empresas e para que as que están e necesiten máis espazo poidan chegar a el”. Ademais, lembrou que se trata dunha “zona industrial estratéxica” para a economía galega xa que reúne unha parte importante das industrias relacionadas co mar, ademais de que se atopa moi ben comunicada, “polo que é unha oportunidade para a nosa contorna contar con máis espazo empresarial”, indicou Isabel Cañas.
Seguindo esta liña expresouse tamén a xerente de SEA, Beatriz Sestayo, que incidiu na vontade da entidade que dirixe de acometer a ampliación do polígono da Tomada: “A nosa intención é axilizar ao máximo as xestións, pero, para que poidamos acometer o investimento, urxe atopar o emprazamento máis adecuado”.
Desde SEA, engadiu Sestayo, “levamos moito tempo traballando para buscar solucións ás demandas dos empresarios, tendo en conta de que xa hai varios que manifestaron a súa intención de establecerse na zona”. Explicou tamén que “tanto é o interese de SEA no proxecto que levamos anos apostando por esta comarca buscando localización para o que pretendemos conseguir o consenso de todos os operadores e administracións implicadas; solicitamos solo na Pobra sen desbotar outros puntos da comarca, e esa vontade é a que mantemos”, conclúe.
Pola súa banda o alcalde da Pobra do Caramiñal, José Carlos Vidal, explicou que “seguimos traballando para que se materialice unha nova ampliación do Polígono Industrial da Tomada; un paso crucial para o crecemento económico da nosa localidade e a xeración de emprego”. Ademais, resaltou que “o noso polígono goza dun tecido empresarial heteroxéneo e dinámico, con empresas líderes nos seus respectivos sectores. Así mesmo, está nun lugar estratéxico, con moi boas comunicacións e servizos na contorna. Témolo todo, só nos falta maior superficie empresarial”.
Esta actuación, dixo, será beneficiosa “desde a perspectiva económica e social xa que somos moitos os municipios que temos como reto a fixación de poboación e a creación de postos de traballo xoga aquí un papel fundamental”. O Concello, concluíu, “seguirá traballando para traer máis solo industrial, máis riqueza para o noso municipio, máis apoio ás nosas empresas e emprendedores”.
Executado en dúas fases
O Polígono Industrial da Tomada executouse en dúas fases xestionadas por SEA. A primeira, cunha superficie bruta próxima aos 223.000 metros cadrados, constou de 48 parcelas e nela instaláronse 35 empresas nunha superficie industrial que superou os 142.000 metros cadrados. Esta fase leva en funcionamento desde 1995.
A segunda fase, inaugurada en 2015, desenvolveuse sobre unha superficie bruta de 106.350 metros cadrados, dos cales máis de 76.000 destináronse a 25 parcelas de entre 1.800 e 5.000 metros cadrados, que, en tan só catro anos, foron ocupadas tamén na súa totalidade.
A terceira fase podería desenvolverse sobre unha superficie duns 180.000 metros cadrados.
