A autora rianxeira Esther F. Carrodeguas vai estar este sábado 5 de outubro na súa terra para presentar o libro seu Iribarne. Será ás 12.00 horas no Centro Sociocultural do Auditorio Municipal. O acto inclúe a presentación propiamente dita e posteriormente un coloquio arredor da adaptación teatral de Iribarne levada a escena pola compañía ButacaZero, coa presenza da autora e produtora, acompañada do director da compañía Xavier Castiñeira e do concelleiro de Cultura Julio Alcalde.
Iribarne é un intento (irreverente) por comprender como chegamos ata aquí a este punto da nosa historia camiñando da man dun deses personaxes secundarios pero absolutamente imprescindíbeis da Fermosísima Historia desta España Miña (esta España Nuestra). En palabras da autora, é “o traballo máis difícil que escribín ata a época, e máis tendo en conta “o extenso da biografía de Fraga.
Carrodeguas engade que “foi complexo atopar o punto de equilibrio do humor, do estilo, así como o lugar desde o que posicionarse”.
“Este personaxe é inabarcábel”, destaca pola súa banda Xavier Castiñeira nunha entrevista recente, engadindo que se ben entende o que fixo Manuel Fraga, “non entende desde onde o fixo e por que fíxoo”. Ambos salientan que pertencen a unha xeración, a da Transición, que creceu rodeada de “un silencio tácito ao redor da historia política recente”, e embarcarse neste proxecto axudoulles a entender de onde vimos.
