O Concello de Outes vén de realizar un curso de Soporte Vital Básico e Desfibriladores Semiautomáticos. A formación, desenvolvida de forma gratuíta para todos os equipos deportivos do termo municipal, foi avalada pola Sociedade Española de Medicina de Familia e Comunitaria SemFYC, a través do programa ESVAP.
O curso, impartido polos membros de Protección Civil, Álex, de Outes e Dany e Moisés, de Rianxo, e coordinados por Fran Lojo, tivo un grande éxito, ao contar co número máximo de participantes.
En palabras do Concelleiro de Deportes, Tono Caamaño, “trátase dun curso que debería ter, non só os adestradores deportivos, senón tamén todos aqueles monitores de actividades que reúnen un certo número de persoas continuamente, ademais de ser interesante para calquera outro colectivo. Trátase de saber como actuar no caso de que suceda algunha contrariedade con calquera persoa e poder axudar, mentres non acoden os servizos de emerxencia”.
É un curso que, dende a Concellaría de Deportes, continuarase ofertando nos vindeiros anos, “xa que existe moita xente interesada e parécenos algo primordial”, sinalou o edil.
