Debido aos recortes orzamentarios que realizou o ministerio de Cultura nas axudas do INAEM, a asociación ASSITEJ vén de cancelar as súas obras de teatro incluídas no Outono Teatral de Outes. No caso da obra que estaba prevista para este venres, Kl’aa tu canción, o Concello ofrece un cambio na programación con Hugo de Os Náufragos Teatro, que se representará este domingo ás 19:00 horas. Esta obra será de acceso gratuíto e gozarán de reserva aquelas persoas que xa conten con bono miúdo. Haberá dispoñíbeis entradas para reserva telemática ou presencial na Casa da Cultura.
O resto da programación que non está dentro do circuíto ASSITEJ decorrerá con normalidade segundo o programa anunciado, explicaron dende a organización do Outono Teatral.
Sinopse
Hugo é diferente. Gústanlle moito os avións e tamén toca o piano. Laia visita a Hugo cada día. A Laia gústanlle falar e as plantas. Hugo ten TEA. A máis recente creación da compañía Os Náufragos Teatro é Hugo, unha peza teatral que aborda o tema do trastorno do espectro autista na infancia. Unha peza chea de sensibilidade e empatía que fala da da diversidade, da convivencia e da beleza de sermos diferentes. A peza está dirixida polo dramaturgo Gustavo del Río e o texto foi creado co asesoramento e colaboración de ASPERGA, a Asociación Galega de Síndrome de Asperger.
