O auditorio da Casa da Cultura de Outes acolle este sábado 2 a representación da obra teatral As Alumnas, de Culturactiva Producións, a partir das 20.00 horas.
Dirixida a un público adulto, a obra trata sobre a figura da pedagoga galega María Barbeito e sobre como o franquismo significou un enorme retroceso na educación do Estado, especialmente para as mulleres. A educación, peza fundamental no desenvolvemento e na liberdade das persoas, especialmente das mulleres, é o eixo fundamental da peza. As dúas personaxes femininas representan dous casos concretos de mulleres no marco histórico anterior e posterior á Guerra Civil, que nos levan a tocar as transformacións sociais do momento.
A peza foi distinguida co Premio Nacional de Literatura Dramática 2023, co Premio Follas Novas 2023 ao mellor libro de teatro e co Premio Luísa Villalta a proxectos pola igualdade.
Está protagonizada por Anabell Gago e Mónica Caamaño.
O espectáculo As alumnas encádrase na programación da 29 edición do Outono Teatral de Outes, o programa escénico do Concello impulsado pola Área de Cultura que dirixe Anxo Núñez, que inclúe unha chea de espectáculos até febreiro do ano que vén.
