A Comisión pola Recuperación da Memoria Histórica do Barbanza (CRMH) presentou hoxe os traballos presentes e futuros nos que está inmersa.
Entre os asuntos máis importantes abordados, destaca a intención da CRMH de celebrar unha xuntanza cos distintos grupos políticos de Ribeira para abordar a retirada da rúa en honra a Miguel Rodríguez Bautista, en cumprimento da lei de memoria democrática. Ademais, a Comisión informou de contactos co arcebispado de Santiago de Compostela para a eliminación da simboloxía franquista presente nalgúns lugares de culto cristián da bisbarra.
Xan Hermida analizou os avances na investigación da escavación no atrio da igrexa de Vliacova (Lousame) e informou das pesquisas para a identificación dos restos dun home entre 30 e 40 anos, que podería ser Perfecto Vilas Romero. Pola súa parte, Carlos Cimadevila ofreceu detalles sobre o I Certame Escolar sobre Memoria Histórica, destinado a mozos e mozas da bisbarra, que poderán participar con proxectos escritos, audiovisuais ou plásticos sobre a memoria democrática.
Outras actividades destacadas inclúen a instalación dunha escultura no campo de concentración de Rianxo en honra ás “madriñas” que atenderon aos presos republicanos, a publicación do caderniño “Memoria Histórica na Literatura Infantil e Xuvenil en Galego” escrito por Pilar Sampedro, e os proxectos para o acondicionamento do entorno do monumento “As voces silenciadas do Confurco”.
Finalmente, a Comisión anunciou que ao longo deste novo curso presentaranse os resultados do traballo realizado por Rocío Lojo Yáñez, estudante de Socioloxía da UDC, cuxo TFG versa sobre a memoria democrática en Boiro.
