Este sábado 05 de outubro, ás 11.00 h, inaugúrase en Rianxo a exposición de pintura Reflejos del Alma, da artista Raquel Rey. A mostra poderá visitarse do 05 de outubro ao 02 de novembro, na sala de exposicións do Centro Sociocultural do Auditorio de Rianxo.
Raquel Rey é unha artista madrileña autodidacta e independente nada no barrio de Tetuán, que logo de iniciar a súa carreira artística sen apenas formación específica decidiu cursar un master en terapias creativas a través da arte, “observando o efecto terapéutico sobre min nas diferentes etapas da miña vida persoal”, sinala na súa biografía, engadindo que leva aproximadamente 15 anos vindo a Rianxo polo verán para instalarse definitivamente no concello a finais de 2023, dando continuidade dende a súa terra de adopción ao seu proxecto artístico. Unha das liñas nas que traballa (e que prolongou en Rianxo) é un proxecto de expresións e xestos faciais. A artista explica que Reflections of the Soul nace deste interese polos trazos humanos e, tamén, “dun traballo a través da introspección como proxecto profesional, logrando promover unha maior autoconciencia a través da arte como terapia”.
