O aviso deste accidente chegou ao 112 Galicia a través do sistema aviso automático de emerxencia do teléfono móbil da implicada, o E-Call, dez minutos antes das 16 horas. Así, esta puido contactar cos xestores do Centro Integrado de Atención ás Emerxencias e explicar que acababa de saírse da vía e que era incapaz de saír do coche.
Pouco despois era un particular o que achegaba información sobre este mesmo suceso, rexistrado no quilómetro 6 da PO-548, á altura da parroquia de Oeste. Este alertador sinalou que o vehículo quedou envorcado na beiravía e que saían lapas do motor.
De inmediato, desde a sala de operacións do 112 Galicia solicitouse a colaboración de Urxencias Sanitarias de Galicia-061, dos Bombeiros do Salnés, do GES de Padrón, da Garda Civil de Tráfico, dos voluntarios de Protección Civil de Catoira e dos servizos de mantemento da estrada.
Os equipos de emerxencias colaboraron para excarcerar á única ocupante do coche accidentado, que foi evacuada en ambulancia ao centro hospitalario de referencia.
