Os vindeiros días 19 e 20 de setembro, o concello de Outes acollerá a novena edición do proxecto EURebirth, centrado na mellora da rexeneración urbana.
Este evento reunirá a expertos e participantes de toda Europa para intercambiar coñecementos sobre rexeneración urbana sostíbel e innovación cidadá.
O evento está aberto a todas as persoas interesadas e terá lugar na Casa da Cultura de Outes.
Para máis información, podemos consultar a páxina web do proxecto EuRebirth ou poñernos en contacto co Consistorio.
As actividades darán comezo o xoves 19 ás 10.30 horas cunha visita ao Proxecto Renatur de rexeneración urbana na beira do río Tins, na Serra. Ás 13.00 celebrarase unha actividade voluntaria de mellora ambiental a carón do dito río.
O venres 20 comezará cunha benvida a cargo do rexedor Manuel González, ás 10.00 horas, e proseguirá coa presentación (ás 10.10) do proxecto EURebirth a cargo de Francesco Marchionni, en representación da Comune de Capizzone. Ás 10.20 será a quenda das conferencias inspiradas e contarase coa presenza de Joám Evans (Fundación Montescola) e de Carmen Fabregat (USC), que presentarán o proxecto Renatur. Esta rolda de relatorios rematará cunha quenda de preguntas dos asistentes. Logo da pausa para o café celebrarase ás 11.30 un xogo participativo de experimentación e renacemento urbano (o xogo do proxecto EURebirth).
