O Grupo de Acción Local do Sector Pesqueiro (GALP) Ría de Arousa renovou recentemente a súa directiva. Este cambio supón a incorporación do Concello de Ribeira ao equipo responsábel desta asociación a través da Concellería de Mar. Para o seu titular, o edil Fernando Abraldes, esta novidade supón “reafirmar o noso compromiso co sector pesqueiro e, en consecuencia, coa sociedade no seu conxunto, pois o rango de acción desta entidade abrangue moitas localidades costeiras”.
O fomento do crecemento económico, a inclusión social, a creación de emprego, o apoio á empregabilidade ou a diversificación das actividades pesqueiras e acuícolas son algúns dos principais obxectivos do GALP Ría de Arousa, onde o ámbito público e privado converxen para a implantación dunha estratexia común orientada cara o desenvolvemento local, o aumento do valor engadido dos produtos pesqueiros, e a preservación e posta en valor do patrimonio costeiro.
“Traballaremos arreo a prol do mar e da súa xente. Cremos que o noso litoral non é só pasado e presente; tamén é garantía de futuro. Profesionalización, diversificación da actividade pesqueira, mellora da competitividade do sector e innovación son algúns dos elementos clave que nos levarán a ese horizonte que temos marcado. E, Ribeira, como o principal porto de baixura de toda Europa, pode aportar moito ao respecto”, relatou o concelleiro do Mar.
Abraldes explicou que “a ría de Arousa ten moito potencial aínda por descubrir. Ten unha gran riqueza de recursos pesqueiros e marisqueiros e son moitas as empresas da cadea mar-industria asentadas no noso territorio, pero, como xa se constatou ao longo de todos estes anos que leva en funcionamento o GALP, sempre ten novas oportunidades que ofrecer. E estas pódense explorar de xeito sostíbel”.
