O Concello de Muros fixo publica este venres 6 de setembro a concesión provisional, en réxime de concorrencia competitiva, das subvencións dirixidas a entidades para a realización de actividades culturais na vila neste ano. As axudas apoian as actividades de 11 entidades e proxectos locais: ADISBISMUR (obradoiro de teatro e musicoterapia); AC Ponte Vella (sábados interxeracionais); Xeitura Esteiro (intercambio de cultura galega con outras comunidades ou Portugal); AAVV A Ostreira (mantemento anual do Galeón), e a Asociación Agrocovo de Esteiro (actividades de música e baile tradicional).
Tamén hai axudas para a AC Coral Don Diego de Muros (viaxes e actuacións da coral); AC O Xeito (representación teatrais); ACRD Cabanas (actividades culturais da); ACD Comisión de Festas de Serres (actividades culturais da festa de San Xoán de Serres); Asociación Xubimar (actividade de pesca recreativa), e a asociación A Maceta de Muros (difusión dos saberes da cultura muradá).
O concello destina preto de 10.000 euros a estas axudas, “na súa maior parte para entidades que levan moitos anos traballando pola cultura de Muros”, asegura a concelleira de Cultura, Caridad González.
“Desde o Concello temos que apoiar ás agrupacións e proxectos que traballan para manter vivas as tradicións locais”, engade a alcaldesa, María Lago.
