O Concello de Boiro sacou a licitación por un importe de 62.171,31 euros o proxecto de instalación de sistemas de seguridade e vixilancia no Polígono Industrial de Espiñeira.
Dende o Consistorio explican que estas actuacións contan co financiamento da Consellería de Economía, Industria e Innovación da Xunta de Galicia a través das axudas encamiñadas á habilitación e mellora de infraestruturas nos parques empresariais.
A actuación que se pretende levar a cabo consiste na instalación dun sistema de seguridade e vixilancia que dea abranguido a todas as empresas situadas no complexo empresarial co obxectivo de “previr roubos, vandalismo ou danos nas propiedades”.
O Concello engade que “aínda que xa se conta cun sistema de seguridade e vixilancia, o que se pretende é a substitución de aquelas cámaras máis antigas e a instalación de novas en zonas determinadas de acceso ou aparcamentos públicos”.
O Parque Empresarial de Espiñeira comezou a súa andaina no ano 1998 coa primeira fase e no ano 2009 coa segunda, alcanzando unha superficie duns 324.500 metros cadrados e mais do 80% das parcelas ocupadas cunhas 50 empresas e que cada vez ten un maior volume de traballo polo que, a instalación de sistemas de vixilancia, “vai contribuír a crear un entorno máis seguro”, engadiron dende o Consistorio.
As empresas interesadas en presentar as súas ofertas poden facelo a través da Plataforma de Contratos do Sector Público ata o 26 de setembro.
