As Festas do Nazareno desenvolveranse do día 13 ao 16 de setembro; uns días para os cales a Concellaría da Igualdade da Pobra do Caramiñal volve activar Espazo Violeta.
Trátase dunha medida que pon en marcha habitualmente a Administración local en eventos festivos multitudinarios. Este espazo habilitarase no interior da praza do Alcalde Segundo Durán e estará atendido por unha educadora social e por unha psicóloga. Eríxese como unha ferramenta de información e sensibilización, pero tamén de acompañamento sobre os pasos por seguir de se producir unha agresión machista.
O horario está vencellado ao ocio nocturno: das 22.00 horas á 01.00 no venres 13, no sábado 14 e no domingo 15; mentres que será das 21.00 ás 00.00 horas no luns 16.
Alí farase tamén a entrega de material divulgativo, como as pulseiras co lema #apobracontraaviolenciamachista, tapas para vasos contra a submisión química, bolsas de tea ou chapas e adhesivos. No remate de cada noite efectuarase un sorteo cun lote destes obxectos.
Contarase novamente coa colaboración dos establecementos hostaleiros, que disporán dun plano coa localización e os horarios do Espazo Violeta e coordinación coa Policía local e coa Protección Civil, no caso de que existise algún incidente.
