O Concello de Curtis e Amicos asinan un convenio de colaboración en materia de inserción laboral e sustentabilidade

O Concello de Curtis asinou este martes, 3 de setembro, o seu primeiro convenio de colaboración coa Asociación Amicos, entidade inclusiva do Barbanza especializada no apoio integral de persoas con discapacidade intelectual. Esta alianza contempla a cesión dunha parcela municipal para realizar labores forestais, ao tempo que se posibilita a inserción sociolaboral de persoas con discapacidade intelectual ou en risco de exclusión social, así como a realización de actividades de sensibilización ambiental.

O acto contou coa presenza do alcalde Javier Fco. Caínzos, e do director xeral do Grupo Amicos, Xoán España, ao que acompañou o coordinador da área de Alianzas con Persoas e Empresas da asociación boirense, Keltoi Cameán. Durante a reunión, exploráronse as posibilidades desta primeira alianza, coa que a entidade pretende acadar tres obxectivos: a rexeneración natural da parcela, a integración sociolaboral de persoas con discapacidade
intelectual e a sensibilización da poboación sobre o coidado medioambiental e a inclusión social. Trala sinatura do acordo, o alcalde do municipio coruñés quixo destacar que “este convenio de
colaboración non só reforza o noso compromiso coa inclusión sociolaboral das persoas con
discapacidade, senón que tamén promove a preservación dos espazos verdes do noso concello
así como a sensibilización medioambiental. Este acordo é unha mostra de como, sumando
esforzos, podemos lograr un impacto positivo na nosa comunidade”.

Pola súa banda, o director xeral de Amicos mostrou “unha gran satisfacción establecer esta primeira alianza co Concello de Curtis, que esperamos se amplíe co paso do tempo. Este é un exemplo máis do importante que é que as entidades públicas e privadas sumemos esforzos para impulsar apostas dirixidas á construción dun futuro inclusivo e ecolóxico, no que tódalas persoas sexan actores activos, e no que as persoas con discapacidade son fundamentais”.

Trátase, engadiu, dun acordo para a preservación forestal, inclusión sociolaboral e sensibilización ambiental Así, a asociación boirense prevé comezar a finais deste ano coas labores de preparación, adecuación e reforestación na finca emprazada no lugar de Gulpilleira. A través destas accións, traballarase tamén para orientar, formar e inserir laboralmente a persoas con discapacidade intelectual ou en risco de exclusión social nas Ecobrigadas, equipos cualificados e especializados en sectores como o forestal ou o mantemento de espazos verdes e xardíns, entre outros.

Outro dos obxectivos de Amicos para este acordo é a realización de actividades de sensibilización con escolares para concienciar á poboación sobre a importancia de preservar o medio ambiente e a necesidade de fomentar a inclusión das persoas con discapacidade intelectual como cidadáns de pleno dereito.