Este sábado 21 de setembro o bo tempo (e o inquebrantábel espírito solidario da veciñanza noiesa) acompañou finalmente a celebración da Andaina Solidaria Noia en Marcha Contra o Cancro, organizada pola pola delegación local da Asociación Española Contra o Cancro (AECC) e máis o Concello. A andaina, que se saldou cunha importante afluencia de participantes, tivo o seu punto de saída pola tarde dende a Alameda. O percorrido foi de tres quilómetros e tivo trazado circular: comezou na Alameda e rematou no mesmo punto.
As e os camiñantes (e tamén ciclistas e usuarios de patinetes e carros de nenos, ademais dun importante número de cans vestidos coa camiseta específica da camiñada) conformaron finalmente unha marea de verde de máis dun milleiro de persoas. A organización agradeceu o espírito solidario dos asistentes, que achegaron 8 euros (adultos) e 5 euros (nenos) para contribuír a loitar contra a lacra do cancro.
O Concello implicouse a fondo na iniciativa. Ademais de botar unha man coa organización, acudiron á cita o alcalde Santiago Freire e os concelleiros Santiago Rodríguez e Laura Salgado. Tamén se implicou un bo número de establecementos a través da patronal Noia Histórica, doando unha manchea de agasallos para a ocasión. A organización estimou unha cifra aproximada de máis de 8.000 euros recadados.
