Santiago acolleu este venres 6 de setembro a presentación do Torneo 3×3, impulsado no marco do Festival Go! Go! Zo! e pola Federación Galega de Baloncesto, co apoio da Secretaría Xeral da Lingua e da Axencia de Turismo de Galicia. O secretario da Lingua, Valentín García, participou destacando “o valor desta atractiva e innovadora iniciativa”que conxuga lingua, deporte, mocidade e tempo de lecer a través de diferentes propostas”. Entre elas, tal e como sinalou, “están as que se inclúen dentro da programacion do CulturON da man de FalaRedes, a iniciativa da Xunta para promover e dinamizar o uso do galego”. García animou a cidadanía, nomeadamente, ás familias con cativada, a achegarse ao monte do Gozo durante a fin de semana.
O campionato terá lugar este sábado 7 e domingo 8 de setembro a partir das 9,00 horas no monte do Gozo e estenderase ata a noite.
Á xornada sumaranse actividades para toda a familia con sesións DJ, Espazo FalaRedes, o Partido das Estrelas, inchábeis, concurso de triplas e sorteos. Deste xeito, o festival Go! Go! Zo! incorpora unha das novidades desta cuarta edición, o Torneo 3×3 da man da Federación Galega de Baloncesto, na que participarán preto de 300 persoas.
De xeito paralelo ao campionato, a Pista 3×3 acollerá o Partido das Estrelas e un concurso de triplas e de habilidades. Ademais, a cativada poderá gozar tamén en espazos, como o escenario Xacobeo, con sesións DJ de música, no da Federación para resolver calquera dúbida co torneo, ou no Espazo FalaRedes, con animación, inchábeis e os concertos Cantigaéverso, sábado 7 ás 11,45 horas, e María Faltri Picadiscos, domingo 8 ás 12,45 horas.
Temos toda a información en www.gogozo.gal, e o regulamento e horarios do torneo en www.fegaba.com, así como nas súas redes sociais (@gogozofestival e @fegababaloncesto).
