Este venres 19 de setembro celébrase en Rianxo o colofón final das Festas da Guadalupe 2024: a última xornada festeira (festivo local). Estará adicada á rapazada con actividades infantís durante todo o día. O Concello explica que “como non podería ser de outro xeito, xa ás 2:00 horas do sábado cantaremos xuntos e xuntas a Rianxeira para despedirnos ata o ano que vén”.
Actividades do venres
Este venres 20 será como dixemos o día infantil. Haberá unha xincana inchábel na praza Virxe da Guadalupe, unha festa da escuma na praza de Castelao (ás 13h), unha sesión vermú con mar de Arousa e pola noite unha gran verbena con Mar de Arousa, Saudade e Charleston Big Band. Tamén haberá unha unha verbena infantil nos xardíns da Ribeira (ás 23h) con As Máis Molonas de Pakolas. Ás 2.00 horas será a gran traca final da festa coas bengalas e o canto colectivo de A Rianxeira.
A Feira do 1924 e o Xantar dos maiores
O mércores e o xoves foron xornadas de grandes celebracións. O mércores 18 desenvolveuse a homenaxe aos maiores co Xantar de Confraternidade e o baile (ás 16h) e pola noite houbo verbena con Os Satélites e América de Vigo. O xoves foi o día do Feirón Mariñeiro (A Feira do 1924) nas rúas do centro histórico. O Feirón foi novamente un convite a viaxar no tempo un século cara atrás nunha xornada participativa e aberta na que se reivindicaron os vellos usos de crear, relacionarnos, traballar e comer. A vila engalanouse novamente de época, “como a vila mariñeira que recordan as nosas avoas e avós” e como reflectían as primeiras fotos tomadas na época. Incluíuse como de costume unha feira de artesanía, con mostra de produtos e oficios tradicionais.
