A Casa da Cultura de Boiro vai albergar este venres un novo espectáculo para a rapazada: Kyoki, unha representación teatral de Elefante Elegante con María Torres e Gonçalo Guerreiro para público infantil e familiar. A cita será ás 20.00 horas este 20 de setembro. As entradas estarán dispoñíbeis na billeteira dende unha hora antes do comezo da función.
A función Kyoki é unha peza teatral sen palabras para nenas e nenos de máis de 5 anos que aborda a temática do esquecemento, da vellez e da soidade. Kyoki significa “demencia” en xaponés e refírese a unha alteración da capacidade para recordar, pensar ou tomar decisións. Baixo este punto de partida, a compañía Elefante Elegante achega unha ollada cómplice, reflexiva e sensíbel sobre o día das persoas que precisan ser coidadas como as propias coidadoras. A familia, as institucións médicas e as institucións sociais están presentes nos tres personaxes interpretados pola actriz protagonista: a avoa, a súa filla e a doutora. A través dunha linguaxe xestual fundamentada na manipulación de obxectos e na interacción constante co dispositivo escénico, o espectáculo crea un universo cómico e poético que viaxa do realismo á hipérbole da vida cotiá.
