O pasado venres 13 de setembro celebrouse o pleno ordinario de setembro no concello de Dodro, que se saldou con acordos importantes como a aprobación da Conta Xeral do 2023 e no que se trataron tres mocións relativas á suba do canon de SOGAMA, dúas sobre transporte público e a non aprobación do Plan Estratéxico de Subvencións do Concello, cos votos en contra de Xente de Dodro e Unión Veciñal de Dodro, xunto coas abstencións do BNG e o PP, o que, en palabras do Goberno local, impediu que saísen adiante as axudas comprometidas polo Goberno municipal a entidades como Cáritas, a Fundación Rosalía de Castro, as comisións de festas, distintos deportistas ou o Club Deportivo Dodro entre outras entidades.
Conta Xeral
O equipo de Goberno de Dodro conseguiu aprobar a Conta Xeral 2023 a “pesar das dificultades e do voto en contra de Xente de Dodro, que se repetiu en todos os puntos do pleno”, sinalaron dende o Executivo.
SOGAMA
O pleno debateu ata tres mocións sobre a suba do canon de SOGAMA; unha do equipo de goberno, PSOE; outra do Partido Popular e unha máis do BNG.
PSOE e BNG criticaron a suba do canon mentres que a do PP defendía a súa necesidade e culpaba ao Goberno central do incremento. Os nacionalistas apostaron tamén por un cambio de modelo que camiñara cara a reciclaxe. As do PSOE e BNG foron aprobadas mentres que a do Partido Popular foi rexeitada polo pleno.
Transporte
Tamén o transporte público tivo unha especial presenza no pleno con dúas mocións de BNG e Partido Popular. Ambas as dúas foron aprobadas e respecto do debate o Goberno sinalou que “quedou reflectido que se trata dun debate recorrente”.
