A IV Andaina Solidaria JEALSA – SD. Barbantia, un dos grandes acontecementos deportivo-humanitarios deste inicio de curso a nivel galego, celébrase este domingo 29 de setembro, con saída dende a praza de Galicia de Boiro ás 10.00 horas.
O recadado na andaina, auspiciada pola conserveira local JEALSA e a Sociedade Deportiva Barbantia, irá dar á oficina compostelá da organización Stop Leucemia (para investigar na loita contra esta doenza poñendo o foco nos novos avances tecnolóxicos). O percorrido será de dez quilómetros e, segundo fixeron saber as entidades organizadoras, presentarase como un percorrido accesíbel e doado de camiñar. A proba non é federada. Habilitarase un dorsal 0 para toda aquela persoa que queira colaborar só cunha cantidade económica. Quen participe na andaina recibirá un agasallo dunha camiseta técnica conmemorativa do evento. O prazo de inscricións formal rematou o martes 24 en emesports pero segue aberto na JEALSA Factory Shop, en Bodión.
