Camiño Escena Norte, o programa de intercambio cultural a través das artes escénicas entre Galicia, Asturias, Cantabria, Euskadi e Navarra, chega por primeira vez a Outes esta fin de semana. Será co ciclo itinerante Constelacións, que permite que 15 compañías dos cinco territorios CEN xiren ao longo dun mes e medio por máis de 60 sedes.
A compañía cántabra El Conejo Salvaje, que aposta por unha creación interdisciplinar na que xunta as técnicas de clown, circo, comedia física e teatro cómico-xestual, recala en Outes este sábado, 21 de setembro, para presentar o seu espectáculo La casa de los dedos. A peza, dirixida a público adulto, presenta a historia dunha barraca de feira que, mentres percorre distintas vilas de España, “mostra o mundo sorprendente e extraordinario do oculto, do alén, das criaturas fantasmagóricas e inexplicábeis que viven entre a poboación, mais pertencen ao mundo dos mortos”, explican dende El Conejo Salvaje, que engade que “La casa de los dedos é unha proposta para esmendrellarse, que congrega sobre un escenario peculiar a tres creadores escénicos excéntricos e multidisciplinares co selo inconfundíbel da comedia xestual, chea de estupidez e provocación de Aitor Basauri, cofundador da compañía Spymonkey”.
As entradas para a única función de La casa de los dedos en Galicia, no marco do Camiño Escena Norte, e que terá lugar o día 21 a partir das 21.00 horas no auditorio da Casa da Cultura de Outes, pódense adquirir a través da plataforma web Bandoticket.com.
