A parroquia do Araño prepárase para o IV Ciclo Cultural Hórreo Vivo, que xa se asenta como fito anual e que nesta convocatoria ofrece novamente un amplo e variado abano de actividades, por exemplo obradoiros creativos de brinquedos e instrumentos tradicionais e populares, teatro infantil, espectáculos, sesións de regueifa, visitas guiadas e, por suposto, concertos.
Utilizando o hórreo máis longo do mundo como símbolo do patrimonio da aldea, as asociacións A Carballeira de Baia e Asociación de Veciñas e Veciños do Araño, apostan deste xeito “por unha programación diversa que poña en valor a riqueza das aldeas”, para o cal contan co financiamento da Deputación da Coruña e o apoio do Concello de Rianxo, lembran.
O ciclo comezará o venres 27 no propio hórreo que dá nome ao evento, cun obradoiro de palletas e frautas de herba impartido por Luis do Río, para logo continuar con teatro infantil con Migallas Teatro.
Ó día seguinte, logo dunha visita guiada ó patrimonio da aldea e a degustación de pan de boroa por cortesía da Panadería de Panmillo, sucederanse os espectáculos pola tarde da man de Sideral Circus Tour e PeterPunk e tamén as regueirafas de Lupe Blando, Josiño da Teixeira e Manolo Maseda.
O peche do ciclo será a noite do mesmo día, cos concertos de Ruckan RockBlues e Recambios Tucho e as actuacións de Pepo Suevos e Isabel Risco.
