Coincidindo coas celebracións do Día Mundial do Alzhéimer, a Asociación AGADEA Ribeira celebrou este mércores 11 un bingo solidario e comunitario na praza de España, a partir das 12.00 e baixo o lema Un día para lembrar.
Na cita participaron usuarios do Centro de Día de AGADEA en Ribeira (aproximadamente medio cento de persoas) e tamén autoridades locais como o alcalde Luís Pérez Barral ou o primeiro tenente de alcalde, Vicente Mariño de Bricio, que cantaron algúns dos números do bingo ante as persoas participantes.
Ademais estiveron presentes representantes de entidades inclusivas de Ribeira e da comarca do Barbanza como A Creba e Ambar, que se sumaron a este acto de sensibilización sobre unha enfermidade que afecta a máis de 70.000 persoas en Galicia.
Tamén acudiu a presidenta de AGADEA, María Isabel Gey, quen lembrou que a asociación xa ten trinta anos de intenso traballo ás súas costas e que Ribeira é unha parte fundamental deste importante traballo. Tamén fixo un chamamento para participar nas actividades previstas para o día 20 en Santiago (a celebración das tres décadas da entidade no Teatro Principal da que falamos con máis detalle neste mesmo artigo).
O comercio local de Ribeira colaborou activamente na organización do evento, ofrecendo agasallos que se repartiron durante o bingo.
A cita do 20 de setembro
O próximo 20 de setembro, ás 19:30 horas, o Teatro Principal será o escenario da celebración do 30º aniversario de AGADEA Alzhéimer. O evento, baixo o lema 30 anos ao voso lado, será unha xornada chea de sorpresas e recoñecementos. Haberá autobuses gratuítos dende Ribeira (saída ás 17.45 dende a praza García Bayón- pasando por Rianxo) e dende A Estrada (saída ás 18.00h dende a praza do Concello).
Un dos momentos máis destacados da noite será o anuncio do gañador do Premio Simbad 2024. Tamén se renderá homenaxe ao labor altruísta, premiando á voluntaria sénior e xuvenil que máis destacaron ao longo dos últimos anos. Ao mesmo tempo se poderá gozar dunha actuación interxeracional, que simboliza a unión entre xeracións na loita contra esta enfermidade.
Tamén se recoñecerá como socio de honra ao neurólogo Alfredo Robles, un dos fundadores de AGADEA hai 30 anos, cuxo traballo e dedicación foron fundamentais para a creación e o crecemento da asociación.
A gala será conducida polo recoñecido actor Antón Coucheiro, que se encargará de levar o fío condutor dun evento que, ademais de conmemorar tres décadas de traballo, servirá para reafirmar o compromiso de AGADEA coas persoas afectadas polo alzhéimer.
A entrada ao evento é gratuíta, pero é necesario inscribirse previamente.
