Veciños e veciñas de Porto do Son encheron o auditorio da Casa da Cultura na estrea do documental O son do mar, elaborado pola produtora Xurdir. Na cita, celebrada este venres 20 de setembro, participaron Luis Oujo, Alcalde de Porto do Son, e Noelia Francisco, directora de produción de Xurdir. O rexedor destacou que se trata dunha peza audiovisual que “recolle a esencia do noso pobo, do noso ser, da nosa terra e do noso mar”.
O documental O Son do Mar foi desenvolvido pola produtora compostelá Xurdir para promover, visualizar e reivindicar as mancheas de tesouros paisaxísticos, naturais, humanos, turísticos, patrimoniais e culturais de Porto do Son.
A presentación estivo aberta á cidadanía.
O audiovisual O son do mar xa se pode visualizar en Vimeo. Inclúe mancheas de entrevistas coas veciñas e veciños do concello, que explican, entre outras cousas, a súa estreita relación co mar, comezando pola orixe do topónimo que dá nome á vila sonense e ao municipio.
Xurdir, con base no Castiñeiriño (Santiago) está a producir unha serie de documentais que teñen como principal obxectivo por en valor a industria e a actividade económica que se realiza nos concellos da nosa terra. Xa ten demostrado o seu bo facer co noso territorio, por exemplo con Boiro, A Pobra, Ribeira e Rianxo, e agora agarda xerar novamente un impacto considerábel nas redes co seu audiovisual sobre Porto do Son.
