A entidade Sociedad Gitana Española emitiu un comunicado no que informa da solución, a aclaración e a conclusión positiva do conflito protagonizado por dúas familias da contorna da ría de Arousa e que tivo o seu momento máis crítico en Deán Pequeno (Ribeira) este 18 de setembro cunha pelexa multitudinaria no dito barrio de Santa Uxía, unha lea na que tiveron que intervir os corpos da Policía Local e Nacional e que supostamente tivo a súa orixe nunha denuncia presentada por unha veciña que acusaba á familia do seu marido falecido de tela retido contra a súa vontade durante días para que gardase “o debido loito” (feitos que por certo son desmentidos no comunicado).
A Sociedade Xitana aclara no seu comunicado que os feitos xa foron perdoados ao intervir este xoves 19 de setembro o rei dos xitanos de Galicia xuntamente con representantes dos consellos de anciáns de Vigo, Marín a Coruña.
No comunicado engádese que “as forzas de Seguridade así como o Concello e a Delegación do Goberno xa teñen coñecemento da resolución positiva desta intervención de paz onde hai que aclarar que non houbo ningún apuñalamento nin existiu ningún secuestro sendo unha invención dunha familia e da outra”. E engaden: “Todo foi falado quedando aclarado perfectamente e as dúas familias enfrontadas farán a súa vida normalizada en diante sen ningún tipo de represalias nin rancores”.
