A Concellaría da Seguridade da Pobra, a través da Policía Local, habilitará diferentes zonas xa recorrentes cara a facilitar o estacionamento do 13 ao 16 de setembro. Esta medida foi tomada ante a previsión de importante afluencia de xente na vila do Caramiñal durante a edición 2024 das Festa do Nazareno. Estes sete puntos do núcleo urbano son: o Gadis situado nos Areos (noite do sábado 14 e todo o día do domingo 15 e do luns 16), no aparcadoiro da rúa Venecia, no de San Lázaro, na explanada portuaria, no Campo da Feira, nas proximidades de acceso ao CEP Salustiano Rey Eiras (estará permitido en ámbolos lados da vía, respectando os vaos e sempre que non se obstaculice a circulación) e no interior do recinto do propio colexio de Bandaseca (só no domingo 15).
Os autobuses que se despracen á localidade no terceiro domingo do mes co gallo da procesión votiva das mortallas, deberán efectuar a parada na explanada portuaria. Ademais, nesa mesma xornada e ata as 15.00 horas, habilitaranse seis prazas de estacionamento destinadas exclusivamente a persoas con mobilidade reducida, na praza Alcalde Segundo Durán, polo que deberán presentar á súa entrada a tarxeta acreditativa da súa situación. A Administración local agradece a disposición, un ano máis, de Gadis por contribuír á cesión do seu espazo para os vehículos.
