A Sociedade Cooperativa Galega do Mar Santa Uxía de Ribeira organiza un ano máis a Xornada de Pesca de Ribeira e faino coa finalidade de “tratar temáticas de gran interese para o sector pesqueiro”. A cita terá lugar o próximo 20 de setembro entre as 10.00 horas e as 14.00 horas na Escola Oficial Náutico-Pesqueira de Ribeira.
A Cooperativa Santa Uxía de Ribeira porá o foco en diversas cuestións de gran actualidade para a pesca galega como o novo regulamento de control, os problemas de comercialización dos produtos pesqueiros en España, a situación actual da pesca de litoral, a problemática vinculada ás capturas accidentais de cetáceos e as oportunidades de financiamento a través do Fondo Europeo Marítimo para a Pesca e a Acuicultura (FEMPA).
Entre as personalidades participantes na xornada estarán o conselleiro do Mar da Xunta de Galicia, Alfonso Villares; o alcalde de Ribeira, Luís Pérez Barral; e a directora da Escola Oficial Náutico-Pesqueira de Ribeira, Gloria Santalla Quintana.
Tamén participarán como relatores o director xeral de Pesca, Acuicultura e Innovación Tecnolóxica da Conselleria do Mar da Xunta de Galicia, Antonio Basanta; a directora de FEDEPESCA, María Luisa Álvarez Blanco; a xefa da área de Control da Subdirección Xeral de Vixilancia Pesqueira e Loita Contra a Pesca Ilegal da Secretaría Xeral de Pesca, Cristina Laborda Sánchez; o xefe de Área da Subdirección de Biodiversidade Terrestre e Mariña do Ministerio para a Transición Ecolóxica e o Reto Demográfico, Rafael Centenera Ulecia; e o profesor titular da USC e investigador da área de Economía Aplicada do Instituto de Estudos e Desenvolvemento de Galicia (IDEGA).
As persoas interesadas en asistir á III Xornada de Pesca de Ribeira poden inscribirse na páxina web da OPP83. O prazo remata o 18 de setembro ás 23.59 horas.
Esta acción divulgativa forma parte do Plan de Produción e Comercialización (PPyC) da OPP83, co-financiado polo FEMPA e a Xunta de Galicia.
